Щӏакхъуэм и ныкъуэр мыракъэ!
Зэдзеитӏ зэдэлажьэу губгъуэм итт. А тӏум зы щӏакхъуэ псо яӏэт гъуэмылэу. Зэдзеитӏым зыр псыхьэ кӏуэуэ къэкӏуэжыху, пщыӏэм къытенам щӏакхъуэм и ныкъуэр ишхащ. Шхэгъуэр къэсу гъуэмылэр къыщащтэм, псыхьэ щыӏар щӏэупщӏащ:
- Мыр сыт, дэнэ мы щӏакхъуэм и ныкъуэр здэкӏуар? - жиӏэри.
- Щӏакхъуэм и ныкъуэр мыракъэ! - жиӏащ зышхам.
- Дауэ, мыр щӏакхъуэ ныкъуэрщ, адрей и ныкъуэр дэнэ щыӏэ? - жиӏащ.
- Адрей и ныкъуэр мыракъэ!
- Мыр щӏакхъуэ псоуэ щыта?
- Щытащ.
- Атӏэ дэнэ щыӏэ и ныкъуэр?
- Мыракъэ и ныкъуэр!
- Мыр и зы ныкъуэрщ, и зы ныкъуэр дэнэ щыӏэ?
- И зы ныкъуэр мыракъэ! - жиӏэурэ зригъэумысакъым.
Къезыгъэхьар @zhygue
