Нэгей и къуэ Лъапщагъуэ
Нэгей и къуэ Лъапщагъуэкӏэ зэджэ джэдуужьым теплъэ хъууэ къуажэм зы дзыгъуэ дэстэкъым.
- Мы къуажэм Нэгей и къуэ Лъапщагъуэ дэсыху, дэ дытыншынкъым, девгъажи дывгъэукӏ джэдуужьыр! - жаӏэри дзыгъуэхэр зэрыгъэгушхуащ. Зэрыгъэгушхуэри дзэшхуэу зэщӏэшэсащ. Зы дзыгъуэ къыдэнакъым къуажэм, псори къызэрехьэжьащ, псори хузэгуэпырт Нэгей и къуэ Лъапщагъуэм.
Къызэрехьэжьауэ къыздэкӏуэм, дзыгъуэ дзэшхуэр псыхьэлыгъуэр къиуауэ ирихьэлӏащ. Къеӏэщ-неӏэри псыхьэлыгъуэм пхъэ закъуэ лъэмыж трагъэлъэдащ, зырыз-тӏурытӏурэ зэпрыкӏри Лъапщагъуэр зыдэс пщӏантӏэр къаухъуреихьащ.
Нэгей и къуэжьым шатащхьэкӏэ зигъэнщӏауэ дыгъэпсым хэлъу шэджагъуэ жей ищӏырт. Япэ ищу пщӏантӏэм дыхьэн къахэмыкӏыурэ, дзыгъуэхэр ӏэуэлъауэ зэрыгъэхъуащ. Абы хэту Нэгей и къуэр къызэщыуащ. Дзыгъуэ дзэшхуэр щилъагъум къахэлъащ, къахэлъэри, дзэм и зэхуэдитӏыр иригъэлъэтэхащ, зэхуэдитӏыр къащтэри зэгуэудащ, зы дзыгъуэжь цӏыкӏу къэнати, хьэрэкъуакӏэ дыхьэжащ.
