Мылажьэ ягъашхэркъым
Пщыжь гуэрым пхъу дахэ дыдэ иӏэт. «Шы дахэмыжэ» жыхуаӏэм хуэдэу, дахэ щхьэкӏэ, ӏуэху ищӏэфыртэкъым. Жьыщӏэфыртэкъым, дыжэфыртэкъым, пщэфӏэфыртэкъым. Пщым ипхъу дахэм псори къылъыхъурт, ауэ, и ныкъусаныгъэр къызэращӏэу, кӏэбгъу защӏырти зыӏурагъэхыжырт.
Икӏэм икӏэжым, и щхьэ закъуэ и лъакъуитӏу псэу щӏалэ тхьэмыщкӏэжь гуэр щыӏэти, ар къылъыхъуащ.
Пщыри егупсысри «зыми имышэу къыдэнэж нэхърэ нэхъыфӏщ» жиӏэщ игукӏи къритащ.
Пщым и пхъум и ӏэпэр щӏалэжьым иубыдри и унэ къишэри къэкӏуэжащ.
- Мыдэ къеплъ, узэрыпщэфӏэнур мыпхуэдэущ, - жиӏэри нысащӏэр иригъэплъурэ и лӏыр пщэфӏащ. Иужькӏэ тӏури етӏысылӏэри зэдэшхащ.
- Иджы сэ мэз сокӏуэ. Уэ упщэфӏауэ, си шхыныр хьэзыру, хуабэу сыкърегъэхьэлӏэж! - жиӏэри лӏыр мэз кӏуащ. Пщыхьэщхьэм фызым зыри имыщӏауэ, унэм шхын дзэкъэгъуэ щӏэмылъу кърихьэлӏэжащ.
Лӏым и ӏэщхьэлъащхьэр дрихьейри пщэфӏащ, ипщэфӏари езыр бгъэдэтӏысхьэри зы дзэкъэгъуэ къыхуимыгъанэу ишхыжащ.
Къыкӏэлъыкӏуэ пщэдджыжьыми аргуэрыжьти, езыр пщэфӏэжри и фызыр къеплъу щысурэ ипщэфӏар ишхыжащ.
- Мес мо уэщыр къэпщтэнурэ, пхъэ пкъутэнущ, ар унэм къэпхьынурэ мафӏэ пщӏынущ. Абыкӏэ упщэфӏауэ си шхыныр хьэзыру сыкъэбгъэсыжмэ, тӏури детӏысылӏэнурэ ӏэфӏу дызэдэшхэнущ! - жиӏэри езым витӏыр щӏищӏэри мэкъушэ кӏуащ.
Нысащӏэр мэжэлӏапэ щыхъум, уэщыр къищтэри пхъэ икъутэну къыщӏэкӏащ. Ентӏыр гъурыжьым етӏыркъыу бгъэдэту и адэр къыдыхьэри унэмкӏэ щигъазэм, и пхъур еджащ:
- Дотэ, унэм умыкӏуэу япэ щӏыкӏэ мы пхъэр къутэ. Мыбы мылажьэ ягъашхэркъым, - жиӏэри.
Къезыгъэхьар @zhygue
