Лӏымрэ хъумпӏэцӏэджымрэ
Зы лӏы гуэр гъуэгу тету здэкӏуэм, гуэдз хьэдзэ зыхь хъумпӏэцӏэджым ӏущӏащ. Лӏым ар игъэщӏагъуэри еупщӏащ:
– Мыр сыт, хъумпӏэцӏэдж, мы плъэфыр?
– Шхын солъэф.
– Атӏэ, уи щхьэр апхуэдэу щхьэ гъум?
– Акъыл илъщи.
– Атӏэ, уи плӏэр щхьэ бгъуэ?
– Къару схэлъщи.
– Атӏэ, уи бгыр сыту псыгъуэ?
– Мащӏэ сошхри.
– Атӏэ, мы гуэдз хьэдзэр сыт хуэдизкӏэ урикъуну?
– Илъэситӏкӏэ.
Лӏым ар и фӏэщ хъуртэкъым. Згъэунэхунщ, жиӏэри унэм ихьащ, хъумпӏэцӏэджымрэ гуэдз хьэдзэмрэ кхъуэщыным ирилъхьэри и щхьэр игъэбыдэжащ.
Илъэс дэкӏащ.
Илъэситӏ дэкӏащ.
Илъэсищ дэкӏащ.
Илъэс еплӏанэр и зэхуэдитӏым фӏэкӏауэ лӏым игу къэкӏыжащ хъумпӏэцӏэджыр. Кхъуэщыныр къищтэщ, и щхьэр ӏуихщ, ӏэнэм триӏубэри, хъумпӏэцӏэджым щӏыгъуу гуэдз хьэдзэ ныкъуэр къихужащ. Лӏым ар телъыджэ щыхъури еупщӏащ:
– Мыр дауэ, гуэдз хьэдзэр илъэситӏтэкъэ узэрырикъуну жыхуэпӏар? Гуэдз хьэдзэ ныкъуэм фӏэкӏа щхьэ умышхарэ?
– Си щхьэм илъти аращ. Уэ илъэсиплӏым нэскӏэ гъэру сыпӏыгъащ, ар илъэситӏым сшхыжамэ, силӏыхьатэкъэ уи гъэрэщым.
Лӏым хъумпӏэцӏэджыр иутӏыпщыжащ.
