Жьуджалэ хэшэнщ
Зэныбжьэгъуитӏ щыӏэт. Зыр хьэрэмт, зыр хьэлэлт. Хьэлэлым фыз дахэ иӏэт. Ныбжьэгъу хьэрэмыр а фызым ехъуэпсэжри и лӏыр иукӏыу фызыр къишэну мурад ищӏащ.
Арати, гъэпцӏагъэкӏэ иукӏыну ӏэщэншэу щӏыпӏэ нэщӏым иришащ.
- Сумыукӏ, къыпхуэгъункъым, жиӏащ лӏы хейм.
- Хэт дыкъилъагъурэ, ихъуреягъкӏэ псэ зыӏут щыӏэкъым, узэрызукӏыу къысхуэгъуагъэххэщ, - жиӏащ лӏы хьэрэмым.
- Зыми дыкъимылъагъуми, жьуджалэ хэшэнщ, - жиӏащ хьэлэлым.
Арати, лӏы хейр и ныбжьэгъу хьэрэмым а щӏыпӏэм щиукӏри а здэкӏуам къыщаукӏа хуэдэу, хьэдэр щӏилъхьащ, хьэдэ хуэӏухуэщӏэхэри хуищӏащ. Зэман щыдэкӏым, фызым иужь ихьэри къишащ.
Махуэ гуэрым лӏым зигъэукӏурияуэ гъуэлъыпӏэм илъу, фызыр абы и лъапэмкӏэ къыщысу здэуэршэрым, жьышхуэ къыкъуэури бжэр къыӏуиудащ, жьым къихьурэ жьуджалэ унэм къыщӏэукӏуриящ.
Жьуджалэр щилъагъум, лӏыр «хьыӏ» жиӏэри дыхьэшхащ.
- Ущӏэдыхьэшхар къызжеӏэ! - жиӏэу фызым щыхигъэзыхьым, лӏым зиумысыжын хуей хъури ӏуэхум и пэжыпӏэр жиӏэжащ.
- Атӏэ, уэ си лӏыр букӏыу гъэпцӏагъэкӏэ сыкъэпшэжауэ ара? - жиӏэри фызым сэшхуэ фӏэдзар кърилъэфри лӏыр иукӏыжащ.
Къезыгъэхьар @zhygue
